Familiedag på museet

Både små og store kan delta i aktivitetar som å lage kongledyr på familiedagen.

Inviterer store og små til aktiv dag på museet

Farging av garn, sentrumsvandring på Sandane, hestekøyring og bygging av konglefjøs er berre noko av det du kan bli med på Nordfjord Folkemuseum 11. juli.

- Desse dagane pleier å vere ganske populære og vi håpar at også årets tilbod skal slå an. Vi trur det er noko for ein kvar smak, seier avdelingsdirektør ved museet, Anne Kristin Moe.

Nordfjord Folkemuseum byr kvar sommar på ein familiedag der både små og store kan få boltre seg i heile friluftsmuseet og delta på fleire aktivitetar.

- I sommar har vi ei utstilling om byggeskikk og i samband med denne har vi fått laga to byggesett, eit grindbygg og eit laftebygg. Det let seg enkelt ta opp og ned, også for dei minste, og er noko vi har planar om å bruke i formidling framover hausten. Dei som kjem på familiedagen blir dei første som får prøve seg som bygningsarbeidarar her, fortel Moe, som legg vekt på at dette er aktivitetar for heile familie.

Variert program

For dei handverksinteresserte kan ein også stifte kjennskap med multikunstnar Vegard Hjartholm. Han byggjer gitarar av sigarboksar, kakeboksar og anna, og skjær ut treskeier av overskotsmaterialet. Sogelaget stiller også opp og tek folk med på vandring i sentrum.

- Det er stor interesse for gamle bilete og historier knytt til hus og bygningar, det ser vi på ulike Facebookgrupper som tek føre seg gamle bilete. Mange ynskjer nok også å vite meir om korleis Sandane sentrum såg ut før og kva bygningar som har stått her lengst, og no har folk sjansen, seier leiar i Gloppen sogelag, Sverre Folkestad.

Vandringa startar på Nordfjord Folkemusem etter at resten av programmet på museet er ferdig, slik at alle kan få med seg alt.

- Vi skal også få fyr i grua i Fargeriet, som jo er eit hus flytt frå Sandane sentrum og til museet. Der skal vi farge garn og lage god stemning. Og så håpar vi sjølvsagt også at mange vil vere med på den daglege omvisinga vår klokka 13. Ein kan fritt kikke i dei opne husa sjølve, men det er gir noko ekstra å få fortalt korleis folk budde og levde, seier Moe.

Norsk Fjordhestgard stiller med hestar slik at dei som vil kan få køyre med eller ri på hest, ein kan få testa hesteskoarmen og balanseevnene ved å gå på stylter. Det blir open kafe med sal av kaffi, pølse med brød, natronkaker, is og brus.